心彤插畫

五月節 ◎路寒袖

蝦米、蚵乾炒菜脯
阿媽舞駕歸半晡
粽葉一拗，糯米做底
五月節職個人客
落甲請入去內底坐

一綰一綰的五月
吊佇簾簷的竹篙椏
芳味黏黏，燒燒
圍佇我的身軀邊
勻勻仔惜，勻勻仔惜

榕仔枝插咧門腳口
妖魔鬼怪毋敢來阮兜
阿爸倒一杯酒
神明夭未敬，就淋落喉
兩爿喙胚紅駕厚厚厚

每一暗咧睏的時
阿媽落用伊消瘦的雙手
甲我拄咧大漢的夢攬咧
伊講：人生若親像肉粽
愛有餡，愛會芳，愛燒燒


註：
☉舞駕：忙得。
☉歸半晡：整個下午。
☉職個：這個。
☉落甲：就將。
☉一綰：一吊。
☉佇：在。
☉簾簷：讀如台語之「尼井」，屋簷下。
☉勻勻仔：原意「舒緩」，引伸為「溫柔」。
☉阮兜：我家。
☉夭未：尚未。
☉淋：喝。
☉喙胚：臉頰。
☉每一暗：每天晚上。
☉落用：就用。
☉拄咧：剛要。
☉攬咧：摟抱住。
☉愛有⋯：須要有⋯⋯。